Í fjør vann Argjabáturin allar róðrarnar í kappingini millum 8-mannaførini. Leygardagin noyddist hann at lúta fyri Miðvingi. Argjamenn og miðvingar tykjast tískil at hava býtt um, og nú eru tað miðvingar, sum eru bestir millum 8-mannaførini.
Sigurin hjá Miðvingi var merkisverdur á tann hátt, at hetta var fyrsti sigurin hjá nýggja bátinum, og hetta er fyrsta ferðin í fjúrtan ár, at Miðvingur hevur vunnið ein róður.
Miðvingur legði seg á odda beinanvegin, og so var tað bara spurningurin, hvussu suverenur sigurin fór at verða. Hann varð rættuliga sannførandi. Argjabáturin vann næstfremsta plássið. Hann var eina bátslongd frammanfyri Rádna úr Fuglafirði, sum kann fara at vísa seg at hava meiri í sær.
