Miðvingur vann tryggan sigur á Vestanstevnu í kappingini millum 8-mannaførini. Hetta var sætti sigurin hjá miðvingum í ár, og harvið hava teir vunnið allar róðrarnar í summar. Á stigatalvuni eru tað sjey stig aftur til næstfremsta bátin, og tí er einki í vegin fyri at siga, at Miðvingur er meistari.
Tað roynist væl hjá miðvingum í kappróðri. Í fjør vann 6-mannafarið Riddarin við monnum FM við fullum stigatali, og nú er tað 8-mannafarið Miðvingur, sum hevur fult stigatal, nú tað bara er róðurin á Ólavsøku, sum bíðar.
Miðvingur hevur verið sera sannførandi alt summar. Sigrarnir hava allir verið trivaligir. Tað hevur allar ferðirnar verið leyst og meiri enn tað aftur til avbjóðararnar, og soleiðis var tað eisini á Vestanstevnu.
Tað eru nítjan ár síðani, at 8-mannafarið hjá miðvingum síðst var meistari. Í kappingini millum 8-mannaførini hevur Miðvingur vunniðFM tvær ferðir – í 1988 og í 1993.
Undanfarnu trý árini var tað Argjabáturin, sum vann FM. Argjamenn hava alt summar roynt at bjóða Miðvingi av. Argjabáturin hevur allar ferðirnar uttan ta einu – á Jóansøku – verið næstfremstur, og aftur leygardagin var Argjabáturin næstfremstur. Men tað var als eingin spenningur um, hvør fór at vinna, og alt skal venda heilt øðrvísi á Ólavsøku, enn tað higartil hevur gjørt, um tað ikki skal eydnast Miðvingi at vinna FM við fullum stigatali.
Umframt Miðving og Argjabátin hevur Gullbrandur úr Fuglafirði luttikið í hesi kappingini í alt summar. Hesa ferð bjóðaði Kvívíkingur seg eisini fram, og kvívíkingar vóru rættuliga pretnir. Teir vóru fremstir í startspurtinum, og teir vóru sera væl við í kappingini um næstfremsta plássið. Á málinum vóru teir bara ein lítlan hálvan skut aftanfyri Argjabátin. Tí verður spennandi at síggja, hvat Kvívíkingurin fer at megna á Ólavsøku.
Havfrúgvin
Heldur ikki á Vestanstevnu lótu tær úr Vestmanna seg órógva á leiðini ímóti FM heitinum. Havfrúgvin hevur vunnið allar seks róðrarnar, og talan hevur í flestu førum verið um sannførandi sigrar.
Undantakið var á Norðoyastevnu, tá ið tað bara var reingin ímillum Havfrúnna og Blik. Báturin av Argjum hevur verið næstfremstur allar seks ferðirnar, men síðan á Norðoyastevnu hevur tað einki verið í sól og mána, sum hevur bent á, at Blikur hevur verið tætt við at taka Havfrúnna.
Á Vestanstevnu var Havfrúgvin fýra sekund frammanfyri Blik. Tað eru tvey sekund minni munur, enn hann var tað á Fjarðastevnu, men tað er framvegis stórur munur á túsund metra teininum.
Merkisvert er tað, at luttøkan í hesi kvinnukappingini er rættuliga lítil. Fyrr í summar luttóku bæði fimm og seks bátar. Á Fjarðastevnu vóru tað bara Havfrúgvin, Blikur og Firvaldur, sum hevur hildið seg á bronsuplássinum í alt summar, men hesa ferð bjóðaði Strípan av Strondum seg fram aftur, eftir at hon var burturfrá á Fjarðastevnuni.
Erla Kongsdóttir
Eftir at tær úr Fuglafirði umborð á Erlu Kongsdóttir í fyrstu atløgu við sigrum á Norðoyastevnu og Eystanstevnu løgdu seg á FM kós, so tóktist stígur at koma í, tá ið Hvassi vann bæði á Sundalagsstevnu og á Jóansøku.
Síðani er Erla Kongsdóttir rættuliga farin á flog aftur, og eftir róðurin í Sandavági leygardagin bendir alt á, at Erla Kongsdóttir úr Fuglafirði fer at vinna FM kappingini millum 5-mannaførini við gentum. Henda kappingin hevur bara verið síðani 2005, og um tað eydnast fuglfjarðargentum at vinna, so verður tað fyrsta ferðin, at hetta FM heitið fer til Fuglafjarðar.
Hvassi var FM vinnari í fjør,og Hvassi er framvegis avbjóðari til FM heitið. Men støðan viknaði ikki sørt hjá Hvassa leygardagin. Starturin kendist ikki at vera góður, og hóast tær úr Sundalagnum stríddu seg alt nærri teimum fremstu, so eydnaðist tað ikki at vinna silvurplássið í Sandavági.
Fípan Fagra lá alla tíðina væl fyri, og tað eydnaðist klaksvíksgentum at halda seg frammanfyri Hvassa. Fípan Fagra var bara eitt sekund aftanfyri Erlu Kongsdóttir, meðan tað vóru tvey sekund frá øðrum plássi og aftur til Hvassa.
Erla Kongsdóttir er trý stig undan Hvassa í FM kappingini, og sammett við á Vestanstevnu skal Hvassi, fyri at vinna FM, vinna meiri enn eina bátslongd inn á Erlu á Ólavsøku, og samstundis skal Fípan ella ein annar bátur eisini vinna á Erlu, um alt skal ganga upp í eina hægri eind hjá teimum í Sundalagnum, og tað skal eydnast Hvassa at taka FM heitið frá Erlu.
Tað er fleiri ferðir komið fyri áður á Ólavsøku, at úrslitini hava verið heilt øðrvísi, enn tey hava verið fyrr á sumrinum. Tað ber motvatión við sær at leggja nógv í venjingarnar næstu stóru vikuna. Hjá Erlu Kongsdóttir, Hvassa, Fípuni Føgru og hjá øllum hinum, sum framvegis vóna og rokna við, at tað ber til at megna gott úrslit í finaluróðrinum og harvið at seta verdugt punktum fyri hesum róðrarárinum.
