Bretskir miðlar skriva í dag, at Arsenal og Borussia Dortmund eru komin ásamt um ein prís fyri Pierre-Emerick Aubameyang. Áleyparin úr Gabon hevur í fleiri ár verið settur í samband við toppfeløg í Evropa.
Dailymail skrivar, at Pierre-Emerick Aubameyang verður Arsenal-spælari í hesum flytingarvindeyganum. Prísur er áleið 460 milliónir krónur, sum er áleið tað saman, sum Arsenal keypti Alexandre Lacazette úr Lyon fyri undan hesum kappingarárinum.
Arsenal seldi fyri kortum Alexis Sanchez til Manchester United, meðan Henrikh Mkhitaryan fór hinvegin. Henrikh Mkhitaryan og Pierre-Emerick Aubameyang eru fyrrverandi liðfelagir í Borussia Dortmund.
Tað hevur eisini ljóðað, at Oliver Giroud skuldi fara til Borussia Dortmund, sum ein partur av avtaluni, men Dailymail skrivar, at nú hevur Chelsea meldað seg sum áhugað fyri áleyparanum. Chelsea hevur seinastu vikurnar verið sett í samband við menn sum Andy Carroll og Peter Crouch.
Pierre-Emerick Aubameyang er 28 ára gamal og kemur úr Gabon. Hann hevur spælt við Borussia Dortmund síðani 2013, og var toppskjútti í Bundesliguni í fjør.
