Finnur Fríði hevur seinastu 20 dagarnar verið og gjørt makrelkanningar í føroyskum sjógvi saman við Havstovuni. Fyribilsúrslitini vísa, at væl meiri var til av bæði makreli og sild í føroyskum sjógvi í ár í mun til somu tíð í fjør, og at støddin á makrelinum nú er omanfyri 30 cm í miðal.
Mest var at fáa norðan fyri og í ein landnyrðing úr Føroyum, meðan væl minni var at fáa sunnan og vestan fyri Føroyar. Nógv sild var eisini at síggja á ekkoloddinum. Nakað av svartkjafti var eisini at síggja, serliga norðan fyri Føroyar. Tað, sum vit fingu av svartkjafti, var smáur fiskur.
Endaligt úrslit av felagskanningunum verður tøkt síðst í august mánað, tá tølini frá øllum fýra luttakandi skipunum verða viðgjørd. Longdarbýti var ymiskt í kanningarøkinum; størsti makrelurin varð fingin norðast í økinum, og størsta sildin varð fingin í útnyrðingspartinum av økinum.
Tølini síggja soleiðis út:
Makrelur: Miðallongd umleið 31,6 cm, miðalvektin umleið 286 g.
Sild: Miðallongd umleið 33 cm, miðalvekt umleið 300 g.
Svartkjaftur: Miðallongd umleið 26 cm, og miðalvektin umleið 112 g.
Æti: Æti var at síggja í teimum ovaru løgunum í øllum kanningarøkinum. Talan var um eitt slag av reyðæti, Calanussp., smáar amfipodur (Themisto sp.) og pílormar (Sagitta sp.). Hesi tølini eru enn ikki gjørd upp.
Kelda: vardin.fo
Lesið frágreiðingina hjá Havstovuni her:
www.hav.fo/PDF/FF1352_turfragreiding.pdf
