Tað mest veruleikakenda er, at farið verður undir verkætlanina at gera Suðuroyartunnil í 2030. Hetta sæst í eini nýggjari samferðsluætlan, Landsverk hevur gjørt fyri, hvussu samferðslan kring landið skal byggjast út hesi næstu árini til 2030.
Annars hava politikarar ført fram, at endamálið skal vera, at tað skal vera koyrandi til Suðuroyar í 2030. Men nýggja samferðsluætlanin er neyvan søtur musikkur í oyrunum á Suðuroyingum. Landsverk heldur nevniliga, at í eini heildarmeting, tá ið hugsað verður um allar tær útbyggingar, sum skulu gerast hesi næstu árini, er tað mest veruleikakent at fara undir verkætlanina at gera Suðuroyartunnilin í 2030. samstundis hevur Landsverk sett eina mynd upp, har tað er koyrandi ígjøgnum tunnilin í 2035.
Men av tí, at hetta er ein so mikið stór verkætlan, hevur Landsverk einki tilmæli um hann, tí í roynd og veru er tað altíð ein politiskur spurningur, nær farið verður undur verkætlanina. Sostatt kann hon bæði verða framskundað, og útsett av politiskum ávum. Men talan er um eina so mikið stóra verkætlan, at hon er ikki við í íløguætlanini hjá Landsverki, tí tað verður ein politiskur spurningur, hvussu hann skal fíggjast.
Landsverk metir, at ein Suðuroyartunnil fer at kosta onkustaðni ímillum 2,8 og 3,4 milliardir, og tað fer at kosta 23 milliónir um árið at halda hann. Men tilsamans fer landskassin kortini at spara 29 milliónir um árið, tí Smyril verður lagdur. Hetta er í dagsins prísum, men tá ið farið verður undir arbeiðið, verður tað dýrari.
Men ein Suðuroyartunnil fer eisini at krevja fleiri avleiddar verkætlanir. Eitt nú skulu upp ímóti 280 milliónir brúkast til nýggjan Sandvíkartunnil og nýggjan veg ígjøgnum Hvalba. Kanska skulu nýggir vegir eisini gerast í Trongisvági, men á Gomlu Rætt er Sandoyartunnilin lagdur so illa, at bilar mugu ígjøgnum fleiri krøpp sving, áðrenn teir koma á høvuðsvegin, og tað má í hvussu so er broytast, sigur Landsverk.
Men hóast tað vera nøkur ár, til farið verður undir tunnilin, heldur Landsverk, at tað er rætt at fyrireika ætlanina, so at tað er klárt at byrja, tá ið politikarar trýsta á start. Og tær fyrireikingarnar eiga at verða gjørdar beinanvegin, og tí verður mælt til, at hesi næstu trý árini verða góðar 3,6 milliónir, tilsamans, játtaðar til fyrireikingar av ymsum slagi. Talan er um jarðfrøðiligar kanningar av ymsum slagi, umframt aðrar kanningar, og tá ið tær eru gjørdar, ber til at leggja linjuføringina meiri nágreiniliga.
Landsverk sigur, at ein beinleiðis tunnil ímillum Sandoy og Suðuroy, verður 23 kilometrar langur, og ein so langur tunnil setir heilt serlig trygdarkrøv. Tí verður mælt til at gera eina níggju kilometrar langan tunnil úr Sandoynni í Skúgvoy og ein tunnil úr Skúgvoy til Sandvíkar upp á 17 kilometrar. Verða tveir tunlar, liggja teir øðrvísi, og tí verða teir longri enn ein beinleiðis tunnil.
Ein annar møguleiki er at gera eina byrging, ella eina brúgv, av Skarvanesi til Skúgvoy. Tað hevði borið til at brúkt grót úr tunlinum til endamálið. Men hóast tað einans er 30 metrar djúpt í sundinum ímillum Skarvanes og Skúgvoy, fara tveir triðingar av gróti av at mangla, og tað má fáast aðrastaðni.
Dekkgrótið, sum skal vera serliga stórt grót, tí tað liggur í opnum havi, má spreingast út aðrastaðni, sigur Landsverk. Ein brúgv upp á fýra kilometrar ímillum Skarvanes og Skúgvoy, er mett at kosta 1,6 milliardir.
Landsverk sigur, at metingar siga, at í 2030 hevði ferðslan ígjøgnum ein Suðuroyartunnil verið túsund bilar um dagin. Tá ið Suðuroyartunniin er komin, verður líka skjótt at koyra ímillum Tvøroyri og Havnina, sum tað er at koyra ímillum Klaksvík og Havnina í dag.
