MENTAN
Turið Kjølbro
Loksins letur til, at Mentunarvirkisætlanin hjá landsstýrinum verður veruleiki. Ein av fyrstu døgunum verður álitið sent avvarðandi pørtum, feløgum og stovnum til hoyringar. Tá ið hesin parturin er avgreiddur, verður álitið almannakunngjørt, tað vil siga um einar tvær-tríggjar vikur.
Fýra landsstýrismenn í mentamálum hava havt álitið um hendi. Um tað er orsøkin til, at tað hevur tikið so drúgva tíð at seta orð á ein komandi føroyskan mentapolitikk, er ilt at meta um, men fleiri ferðir hetta valskeiðið hevur verið boðað frá, at álitið hevur verið á gáttini.
- Tað er torført at skriva eitt slíkt álit, sum umfatar so nógv. Nógvir stovnar og feløg eru umfatað og tað tekur tíð. Sjálvsagt er tað eitt sindur spell, at álitið kemur so seint í valskeiðnum. Hendan samgongan fær ikki teir stóru møguleikarnar at gera so nógv út frá álitinum, men tað fær komandi landsstýrið so ístaðin, sigur Óli Holm.
Mentan kostar
Í samgonguskjalinum stendur, at ein greiður mentunarpolitikkur skal orðast við støði í millum øðrum mentunarálitinum ?Avmarkaður marknaður?, sum varð gjørt miðskeiðis í nítiárunum. Síðani henda samgongan fór til verka hava embætisfólk í Mentamálastýrinum arbeitt miðvíst við virkisætlanini.
Landsstýrismaðurin í mentamálum, Óli Holm, vil ikki siga nakað ítøkiligt um innihaldið í virkisætlanini. Ei heldur um, um virkisætlanin fer hava við sær, at meiri peningur verður settur av til mentan í komandi tíð. Fíggjarlógin, ið júst er samtykt, gevur ikki nakra ábending um, at vit fáa ein orðaðan mentapolitikk innan stutta tíð. Játtanin til mentanina stendur stórt sæð í stað í ár í mun til í fjør.
- Hækkingarnar í fíggjarlógini í fjør til mentunarøkið, sum vóru rættiliga stórar, skulu síggjast sum ein byrjan. Vit hava tíverri ikki havt møguleika at økt játtanina í sama mun aftur í ár, millum annað tí, at onnur øki eru raðfest og tí, at vit fyrst skulu hava nakrar karmar at arbeiða út frá. Hinvegin haldi eg, at mentanin í Føroyum hevur tað gott og játtanin til mentanina er nøktandi. Men sjálvsagt eru øki, sum kundu fingið meiri, sigur Óli Holm.
Játtanin til mentanina í undanfarnu fíggjarlóg vaks við tíggju prosentum í mun til árið fyri.
Mentanarráðið
Fyrr enn nýggja mentanarvirkisætlanin verður almannakunngjørd, ber ikki til at gera nakra mynd av, hvat skapandi listafólk og mentanin sum heild kunnu vænta í framtíðini.
- Eg vóni at fáa eitt álit, sum fevnir vítt um mentanina sum heild, og at vit kunnu seta út í framtíðarkortið, hvussu mentanarlívið í Føroyum kann mennast. Í fyrstu syftu rokni eg ikki við, at játtanir til ymisk mentanarøki verða lógarfest, tí fíggjarlógin verður altíð avgerandi fyri fíggjarkarmarnar, sigur Óli Holm.
Um aðalorðaskifti verður í løgtinginum um nýggju mentanarvirkisætlanina, er støða ikki tikin til enn.
