Ein línubátur er nú minni í flotanum, tí sunnunáttina sakk Oddny nakað norður úr Nakkinum.
Um sjey tíðina leygarkvøldið sendi línubáturin Oddny út neyðarkall. Teir vóru staddir tígggju fjórðingar norður úr Nakkinum, og báturin var farin at leka.
Tað var vánaligt veður, og veðurforsagnirnar vóru ikki góðar.
Fleiri skip vóru nærindis, og næstur var trolbáturin Ametyst, sum beinanvegin fór at sigla til Oddny.
Ametyst var bara einar fimm fjórðingar frá, og hann var tí skjótt á staðnum.
Tað eydnaðist at fáa teir tríggjar menninar umborð á Ametyst, sum royndi at seta fast á Oddny, men endin slitnaði.
So kom Triton til og tók yvir uppgávuna at halda eyga við Oddny.
Sakk
Tá ið klokkan var 02.10 sakk Oddny.
Robert Olsen, leiðari á MRCC rósar manningini á Ametyst fyri gott arbeiði hesa náttina. Veðrið var vánaligt, men teir fingu kortini menninir av Oddny í øllum góður.
Støðan umborð á Oddny var alt annað enn góð. Teir varnaðust lekan so seint, at einki var at gera. Ljósið umborð fór, motorurin steðgaði, og skipið bara rak. Teir høvdu bara fartelefonir at samskifta við.
Menninir høvdu latið seg í yvirlivilsisdraktir og gjørt klárt at fara í bjargingarbát, men av tí at Ametyst kom til hjálpar, var hetta ikki neyðugt.
MRCC bílegði tyrluna, men líkindini vóru vánalig. Tað gjørdist tó ikki neyðugt hjá tylruni at gera nakra roynd.
Ametyst fór inn á Klaksvík við monnunum.
Oddny varð smíðaður í 1947. Eigari var K.M. Sp/F í Klaksvík.
