Tað er valla nakar, sum hevur roknað við kollveltdandi útmeldingum frá Landsfundi Sambandsfloksins um vikuskiftið. Hinvegin hava altjóða fíggjarkreppan og samgongustevið fylt so nógv í politiska gerandisdegnum, at ein kundi væntað nakrar tungar politiskar útmeldingar frá flokkinum, ið hevur fyrisætið í samgonguni.
Vanligt er, at flokkar á landsfundi seta út í kortið ta kós, ið skal verða hildin og taka fram stór og prinsipiell mál. Vanliga verður við hesum tikið støði í samgonguskjalinum. Hvørji eru so tey mál, sum Sambandsflokkurin lyftir fram í síni landsfundaryvirlýsing? Fyrst verður tikið dyggiliga undir við tí politikki, sum samgongan hevur fest niður í samgonguskjalið. Við hesum kann staðfestast, at Sambandsflokkurin sum heild ikki tekur undir við ávísum tingmonnum floksins, sum meira ella minni opinlýst hava roynt at seta kílar í samonguna. Sostatt kann landsfundurin tulkast sum eini boð frá flokkinum til innanfloksandstøðuna um at rætta inn og geva samgonguni arbeiðsfrið.
Samtyktin er áhugaverd ikki so nógv orsakað av teimum politisku málum, sum eru raðfest og sum skulu røkkast í hesum valskeiði, men minst líka so nógv orsakað av teimum evnum, ið ikki eru nevnd ella gjøllari umrødd í samtyktini. Líta vit fyrst at teimum málum, ið verða tikin fram, so má ásannast, at flokkurin í fyrstu atløgu hevur fingið gongd á fyrsta part av sínum Europapolitikki. Í samgonguskjalinum er ásett, at ein serfrøðingabólkur skal greina allar møguleikar fyri tilknýti til ES og møguleikan fyri EFTA-limaskapi. Við støði í frágreiðingini verður viðgjørt politiskt, hvussu víðari verður farið fram. So vítt so gott, nú verður spennandi at síggja, hvørja lagnu henda serfrøðingafrágreiðing fer at fáa, tá hon einaferð kemur í ljós. Sambandsflokkurin hevur lovað ein heilt nýggjan Europapolitikk. Hesin politikkur kemur ikki burturúr nakrari serfrøðingafrágreiðing eina, tí hesin poltikkur fortreytar nakrar harðar og sera torførar politiskar avgerðir, sum eingin flokkur ella samgonga higartil hava megnað at taka. Tíðin fer at vísa, hvørt leiðsluførleiki og politiskur ryggur er í samgonguni til at taka hesar avgerðir og seta tær í verk.
Tað eru onnur merkisverd viðurskifti við landsfundarsamtyktini. Hóast samtyktin tekur fram týðandi mál sum játtanarskipan, fíggjarlóg, kommunulóg, eftirlønarskipan, gransking, umhvørvi, fiskitilfeingi, so er her talan um mál, ið hinir báðir samgonguflokkarnir umsita. Her er lítið og einki um tey stóru og tungu mál, sum Sambandsflokkurin varar av í landsstýrinum. Her er einki um almannamál og einki um vinnumál, ið eru meira enn aktuel í hesum døgum. Her er heldur einki, sum minnir um eina samlaða kreppustrategi, nakað, sum má vera ábyrgd løgmans. Her melur flokkurin um heita greytin. Hetta kann alt vera av tilvild, men hetta kann eisini vera tilvitað. Hetta er í øllum førum eitt sindur løgið.
