Meistaraglaðir spælarar hjá FC Barcelona máttu flýggja

FC Barcelona vann í gjár spanska meistaraheitið við einum 4-2 sigri á útivølli móti grannunum úr Espanyol. Eftir dystarenda fegnaðust spælararnir á vøllinum, men tað endaði við at áskoðarar hjá Espanyol komu á vøllin eftir teimum.

Tað er lítil kærleiki millum FC Barcelona og Espanyol í løtuni. Fyrr í hesum kappingarárinum vildi FC Barcelona ikki loyva áskoðarum hjá Espanyol inn á Camp Nou til grannadystin. Í gjár svaraði Espanyol aftur og setti somu treytir, sjálvt um FC Barcelona kundi endaliga vinna sær meistaraheitið.

FC Barcelona var nógv betri á vøllinum og var eitt skifti á odda 4-0 við millum annað tveimum málum frá Robert Lewandowski. Tað endaði við einum 4-2 sigri og gullheiðursmerkininum.

Hópurin hjá FC Barcelona fór út á miðjuna og fegnaðist eftir seinasta bríksl, men tað endaði í roki. Áskoðarar hjá Espanyol runnu inn á vøllin og hóttu spælararnar hjá FC Barcelona. Meistararnir máttu renna av vøllinum og inn í skiftirúmið.

##med2##