- Mælt verður til, at skipað verður eitt føroyskt útflutningsráð at røkja áhugamál hjá føroyskum útflutningsvinnum, og at hetta eigur at verða gjørt í tøttum samstarvið millum almennu fyrisitingina og vinnulívið, sigur Føroya Arbeiðsgevarafelag.
Hetta sigur felagið, nú nýggja danska stjórnin ætlar at leggja størri dent á teir nýggju vakstrarmarknaðirnar. Hon leggur upp til eina nýggja strategi til tess at økja um danska útflutning til ikki bara BRIK-londini (Brasilia, Russland, India, Kina), men eisini til nýggja hávakstrarmarknaðir sum Suðurkorea, Vietnam, Suðurafrika, Indonesia og Turkaland.
Tað er handils- og íløguráðharrin, Pia Olsen Dyhr, sum skal standa fyri at gera nýggju strategiina. Hon trýr uppá, at um størri orka verður nýtt á hesum øki, fer hetta at skaffa arbeiðspláss til Danmarkar.
Føroya Arbeiðsgevarafelag vísir í sínum vinnusjónarmiðum á, at tað er neyðugt at vit røkja okkara áhugamál sum land. Eisini verður víst á, at vit í Føroyum ikki hugsa nóg strategisk í mun til umheimin.
- Vit undrast á, at so lítil dentur verður lagdur á marknaðarføring av føroyskum útflutningi. Vælvirkandi útflutningsvinnur eru sera umráðandi fyri føroyska búskapin.
Mælt verður tí til, at skipað verður eitt føroyskt útflutningsráð at røkja áhugamál hjá føroyskum útflutningsvinnum, og at hetta eigur at verða gjørt í tøttum samstarvið millum almennu fyrisitingina og vinnulívið.
