VINNULÍV
Eirikur Lindenskov
eirikur@sosialurin.fo
Í 2007 var Sp/F 14 størsta føroyska partafelag, um hugt var eftir eginpeninginum, sum tá var 559 milliónir krónur. Nú er hann tódnaður niður á 31 milliónir.
Felagið sigur í tíðindaskrivi, at gjaldførið er gott, eginpeningurin er á haldgóðum støði, og støðan í Sp/f 14 er sum heild nøktandi, hóast ársroknskapurin fyri 2008 vísir eitt hall á 527 mió. kr. Kurstap eru orsøk til stóran part av hallinum, men felagið roknar við at vinna ein part av tapinum inn aftur sum frálíður
- Felagið hevur seinnu árini vunnið nógvan pening, og nú hevur felagið mist nógvan pening. Soleiðis eru korini á einum marknaði, sum at kalla hevur verið í undantaksstøðu. Mest týðandi er, at eginpeningurin er á haldgóðum støði, gjaldførið er gott, og at vit uttan trupulleikar svara hvørjum sítt. Virksemið heldur fram, og vit hava rímiliga góðar vónir til framtíðina.
Hetta sigur Gunnar Mohr, stjóri í føroyska íløgufelagnum Sp/f 14, í sambandi við, at ársroknskapurin fyri 2008 er góðkendur á aðalfundi felagsins.
Í stuttum vísir roknskapurin eitt hall á 527 mió. kr. Av tí, at Sp/f 14 fæst við íløguvirksemi, stavar hallið fyri stóran part frá kurstapum av virðisbrøvum. Meginparturin, stívliga 330 mió. kr., eru tó ikki-staðfest kurstap, ið felagið kann vinna inn aftur sum frálíður.
- Árið 2008 var ómetaliga turbulent fyri tey, sum virkað innan íløguvirksemi. Í so máta slapp heldur ikki Sp/f 14 undan, sigur Gunnar Mohr.
Stjórin undirstrikar tó, at eginpeningurin er á haldgóðum støði, stívliga 31 mió. kr. Harumframt er gjaldførið gott og raksturin í tryggari legu.
- Vit kunnu ikki annað enn fegnast um, at vit hava positivan eginpening og nøktandi gjaldføri í ringastu kreppu í nýggjari tíð, sigur Gunnar Mohr.
Sp/f 14 hevur í mong ár verið virkið í føroyskum vinnulívi, og seinnu árini eru íløgur m.a. gjørdar í børsskrásettar fyritøkur. Virðisbrævamarknaðirnir eru hart raktir av heimsfevnandi fíggjar- og búskaparkreppuni, ið rakar føroyska marknaðin sera meint.
- Fyritøkurnar, sum Sp/f 14 hevur gjørt íløgur í, eru grundleggjandi sunnar. Samstundis vita vit, at fíggjar- og búskaparkreppan er ikki ein áhaldandi støða. Tí rokna vit við, at virðið á okkara íløgum fer at vaksa frameftir. Har eru góðir vakstrarmøguleikar, og sum íleggjarar skulu vit geva tol, sigur Gunnar Mohr, stjóri í Sp/f 14.
Fáir partaeigarar eru í Sp/f 14. Tó hevur almennur áhugi verið fyri felagnum seinasta árið, og tí hevur felagið valt at almannakunngera høvuðstættirnar í roknskapinum.
