Meinhard E. Olsen og liðfelagarnir í Mjøndalen fingu eina góða upphiting til norska tjóðardagin, ið verður í morgin 17. mai.
Á heimavølli vann Mjøndalen í dag 2-1 á Åsane í dysti í næstbestu norsku fótbóltsdeildini.
Tá átta minuttir vóru leiktir legði Meinhard Mjøndalen á odda 1-0. Meinhard var settur at skjóta eitt brotsspark. Málverjin bjargaði, men Meinhard var skjótur at skora upp á returin.
Talan var um annað málið hjá Meinhardi hetta kappingarárið.
Minuttin aftaná økti Mathias Bringaker til 2-0. Åsane minkaði um munin til 2-1 beint undan steðginum, og so komu ikki fleiri mál í dystinum.
Mjøndalen vann sostatt annan dystin í kappingini í ár, og teir eru nummar 10 í deildini við níggju stigum.
