Seinnapartin í gjár, sjálvan danska grundlógardagin, var toftamaðurin og kringvarpsmaðurin, Tórður Mikkelsen, ein túr inni á gólvinum í Undirhúsinum á Toftum.
- Tað plagi eg at vera av og á, tá møguleikin er. Visti ikki, at Meinhard Jacobsen skuldi greiða sambygdarmonnum sínum frá stóra fiskavirkinum hjá Royal Greenland, sum hann leiðir í Pólandi.
Tað skrivar Tórður Mikkelsen á sínari facebook-síðu í gjár. Á síðuni hjá honum liggja fleiri myndir frá løtuni í Undirhúsinum í gjár.
- Hetta var ógviliga áhugavert, og uppmøtingin var góð. Er tað nakað, ið hevur áhuga fyri hesar menn, sum samlast í Undirhúsinum, so er tað fiskivinnan.
Tórður Mikkelsen greiðir frá, at eftir áhugaverdu framløguna hjá Meinhardi Jacobsen var harmonikan tikin fram og trivið varð í nakrar sangir úr undirhúsheftinum.
- Annars syngja teir fast hvønn mikudag í Undirhúsinum, umframt at teir syngja til ymisk tiltøk. Hetta var ein sera hugnalig og upplýsandi løta, staðfestir Tórður Mikkelsen.
