Tað sær kortini út, sum tann yngri og hyperaktivi Sjúrður rennur undan tí eldra og stóra Edmundi, sum verður noyddur at gera eitthvørt á Christiansborg, sum veljararnir heima í Føroyum leggja til merkis.
Saltsiloin er komin upp á pláss – hann fekk klórað nakrar danskar milliónir heim til endamálið. Hóast Bjørn mentamálaráðharri hevur sagt, at Edmund dugir so væl at finna pengar, at hann eisini kann finna pengar til Hvalastøðina við Áir, so hevur Edmund ikki reist tað málið enn.
Tað síðsta stríðið millum kamphanarnar á danatingi er um makrelin og boykottið hjá ES.
Nú er tað Sjúrður, sum er partur av stjórnargrundarlagnum, fyri valið var tað Edmund, sum nú heldur, at Sjúrður hevur gjørt alt ov lítið til at ávirka stjórnina.
Heldur enn at fortalt okkum, at Sjúrður hevur gjørt ov lítið, so átti Edmund at tikið lógvatak saman við Sjúrði, og sett allar danskar politikarar upp á pláss í málinum. Sjálvandi skal Danmark taka atlit til føroysk viðurskifti, so leingi tey eru saklig.
Vit hava ikki amerikanskar tilstandir – enn, har útspilling er vegurin fram í politikki. Ein politikari fær viðring víð at vísa á sini egnu avrik, heldur enn at tosa ilt um mótstøðufólk.
