Saman við býlisútreiðslum eru matvørur orsøkin til, at brúkaraprístalið hækkaði 1,5% seinasta ársfjórðingin Tað skrivar Hagstovan á heimasíðu sínari.
Frá 1. ársfjórðingi til 2. ársfjórðing hækkaði brúkaraprístalið 1,5 prosent, úr 107,5 til 109,1. Tað er serliga størri býlisútreiðslur og hægri prísir á matvørum og bensin, sum toga brúkaraprístalið uppeftir.
Fyri býli samanlagt eru prísirnir farnir 4,4 prosent upp. Rentan á íbúðalánum er hækkað 6 prosent, húsaleiga 8,3 prosent og brenniolja til húsarhald 6,5 prosent.
Prísurin á brennievni til akfør er hækkaður 8,3 prosent.
Prísvøksturin fyri matvørur samanlagt var 1,4 prosent seinasta ársfjórðingin.
Prísirnir eru farnir upp í flestu matvørubólkum, mest á eplum og grønmeti, kornvørum, fitievnum og kaffi.
Tað er eisini vorðið dýrari at eta úti, prísirnir á matstovuveitingum eru farnir 1,2 prosent upp.
