Kreppa
Samtakið Maru Seafood er ein av teimum heilt stóru fiskivinnufyritøkunum í Føroyum, sum bæði hevur virkir og skip undir sínum hatti.
Virkini, sum felagið rekur í Klaksvík og á Eiði, hava út við 200 fólk í arbeiði, og einir 100 mans eru knýttir at teimum átta skipunum, sum felagið eisini hevur undir sínum hatti.
Felagið hevur rikið trý virkir, Kósina, Eystís, sum er gamla Roykivirkið í Klaksvík og Norðís á Eiði.
Á Eystís starvaðust eini 35 fólk, sum fingust við at roykja hýsu og upsa, men sama virksemi er eisini á Eiði. Fyri eini tíð síðan helt virksemið á Eystís uppat, og flestu arbeiðsfólkini endaðu á Kósini.
Bæði á Kósini, sum serliga virkar portiónir úr upsa og nakað av saltfiski og á Norðís á Eiði, sum roykir hýsu og upsa, hevur verið nógv arbeiði.
Tað hevur gingið rímiliga væl at manna Kósina, meðan truplari hevur verið at manna Norðís, har tørvur alla tíðina er á arbeiðsfólki.
Skipini, sum Mary Seafood eisini eigur meirilutan í, eru teir seks ísfiskatrolararnir Navarin og Borgarin, Nónhamar og Fjalshamar og Safir og Smaragd. Línuskipini eru Grani og Fugltúgvan.
Fleiri feløg eru undir hattinum hjá samtakinum Maru Seafood og stjórin, Jóhan Páll Joensen, letur sera illa at gongdini.
Lagnan óviss
Maru Seafood fer at hava aðalfund ein av fyrstu døgunum, og fyrr enn tann fundurin verður, verður heldur ikki endaliga greitt, hvussu úrslitið hjá samtakinum fyri farna ár verður.
- Men tað er greitt, at úrslitið verður vánaligt, sera vánaligt, sigur Jóhan Páll Joensen.
Hann ásannar, at raksturin av virkseminum hjá samtakinum bæði á landi og sjógvi hevur verið vánaligur.
- Jú, eg stúri fyri gongdini, sigur hann, tá vit spyrja, um hugsandi er, at virksemið hjá felagnum kann fara av knóranum.
Jóhan Páll sigur, at í tíðum sum hesum, tá so nógv viðurskifti ganga ímóti, er man altíð útsettur fyri, at tað ringasta kann henda.
- Men vit royna, og eg vóni ikki, at tað verður so galið kortini.
Alt kann henda
Vit spurdu eisini stjóran í Maru Seafood, um hugsandi er, at nakað kann henda á aðalfundinum, sum ger, at alt virksemið hjá samtakinum steðgar í einum.
- Tá raksturin er so vánaligur, og útlitini eru so døpur, er vandin altíð til steðar.
Bæði fiskavirkisvinnan hjá Maru Seafood og Faroe Seafood, sum eru størstu samtøkini av sínum slagi í Føroyum og skipavinnan hjá somu feløgum hava tað sera trupult í løtuni.
- Broytast fyritreytirnar ikki við stagnatión ella lækking í oljuprísunum, og raksturin í vinnuni á landi gerst meira lønandi, hevur virksemið ongan møguleika, sigur stjórin.
Tað vísir seg, leggur hann aftrat, at tá tað gongur væl, gongur alt væl – og tá tað gongur illa, gongur bara alt illa.
Treingir samanum
Stjórin í Maru Seafood ásannar, at trupult er at fáa pening til rakstur av virkseminum.
- Alt treingir saman um, og tað er sera trupult at reka vinnu, soleiðis sum umstøðurnar eru í løtuni.
Toskaveiðan undir Føroyum er í løtuni á tí minimala, og hetta sæst eisini aftur í allari fiskivinnuni.
- Toskurin hevur 4-5 ferðir so góðan prís, sum eitt nú upsi, og tí er greitt, at tað merkist um alla vinnuna, tá toskurin svíkur.
Jóhan Páll Joensen sigur, at vónin hjá skipavinnuni er, at oljuprísurin stagnerar – og helst lækkar – samstundis, sum meira verður at fáa av toski.
- Neyðugt er eisini, at raksturin av fiskavirkjunum gerst meira lønandi aftur, sigur stjórin í einum av størstu fiiskivinnusamtøkum í Føroyum við umleið 300 fólkum undir sínum hatti.
