36 ára gamli belgiski miðvallarin, Marouane Fellaini hevur stillað gaggurnar.
Fótbóltsáhugaðir føroyingar minnast serliga Marouane Fellaini fyri tíðina millum 2008 og 2019, tá hann fyrst spældi fimm kappingarár við Everton, og eftir tað seks kappingarár við Manchester United.
Vørumerkið hjá Marouane Fellaini hesi árini var sermerkta hársniðið hjá honum. Ikki ólíkur kolumbiska, Carlos Valderama í so máta.
Við United vann Marouane Fellaini FA Cup, Liga Cup og Europa League. Við Standard Liege vann hann belgiska meistaraheitið, og við Shandong Taishan í Kina eydnaðist tað honum á einum sinni at vinna meistaraheitið, og tríggjar ferðir at vinna kinesisku steypakappingina.
Marouane Fellaini spældi 667 kappingardystir fyri Standard Liege, Everton, Manchester United og Shandong Taishan. Í hesum 667 dystunum skoraði hann 136 mál, og hann legði upp til 63 mál.
Marouane Fellaini spældi 87 landsdystir og skoraði 18 mál fyri Belgia. Saman við belgiska hópinum vann hann HM-bronsu í 2018.
