Mánadagin var tað Bjarni Djurholm og í dag er tað so Marjus Dam, sum bjargar Javnaðartingkvinnuni Katrin Dahl Jacobsen. Hon er burturstødd, tí hon er á fundi fyri løgtingið í Norðurlandaráðnum.
Tískil er hon ikki til staðar í tinginum í dag, tá tað skal atkvøðast um skerjingar av fiskidøgunum. Men hon hevur fingið Marjus Dam úr Sambandsflokkinum at cleara fyri seg, eins og Bjarni Djurholm gjørdi mánadagin.
Tað merkir, at Marjus Dam ikki verður til staðar, tá atkvøðast skal seinni í dag. Sambandsmaðurin er annars í tinginum just nú, málið verður viðgjørt.
Sjúrður Skaale hevur eisini boðað frá, at hann fer at atkvøða fyri skerjingum av fiskidøgunum eins og hann gjørdi mánadagin. Tískil verður atkvøðubýti í dag tað sama sum mánadagin, 16 fyri og 15 í móti skerjingum av fiskidøgunum.
