Føroyingauppgerð var í bestu donsku hondbóltsdeildini hjá kvinnum í dag.
Í Fælled-høllini í Skanderborg vunnu Súna K. Hansen og hinar hjá heimaliðnum 29-24 á Mariu P. Nólsoy og liðfeløgum hennara í Horsens. Í steðginum var Skanderborg á odda við tveimum málum, 15-13.
Súna skoraði tvey mál upp á sjey málroyndir. Hon legði eisini upp til tvey mál (assist), og vann liðnum eitt brotskast.
Maria skoraði sjey mál upp á níggju málroyndir, og hon var toppskjútti hjá Horsens í dag. Maria legði eisini upp til trý mál og vann liðnum eitt brotskast. Maria var sambært hagtølunum mest effektivi leikarin hjá Horsens í dag.
Landsliðsmálverjin, Rakul Wardum slapp næstan ikki upp í part, tá lið hennara, Ringkøbing á heimavølli vann 37-29 (13-12) á Bjerringbro. Stephanie Christensen vardi málið hjá Ringkøbing gott og væl allan dystin.
Støðan:
| Nr. | Lið | Dystir | Stig |
| 1 | Team Esbjerg | 22 | 43 |
| 2 | Odense | 22 | 42 |
| 3 | Nykøbing Falster | 22 | 34 |
| 4 | Ikast | 22 | 31 |
| 5 | Viborg | 22 | 29 |
| 6 | Keypmannahavn | 22 | 24 |
| 7 | Sønderjyske | 22 | 18 |
| 8 | Horsens | 22 | 16 |
| 9 | Silkeborg-Voel | 22 | 14 |
| 10 | EH Aalborg | 22 | 14 |
| 11 | HØJ | 22 | 13 |
| 12 | Ringkøbing | 22 | 12 |
| 13 | Skanderborg | 22 | 11 |
| 14 | Bjerringbro | 22 | 7 |
