Sambært argentinsku fótbóltslegenduni, Diego Maradona hevur núverandi besti argentinski fótbóltsspælarin, Lionel Messi onga persónligheit. Talan er ikki um eina almenna útsøgn, men nakað, sum Diego Maradona segði í samtalu við brasilsku fótbóltslegenduna, Pelé.
Diego Maradona og Pelé vistu ikki av, tá teir vóru staddir í París í samband við ein fótbóltsdyst fyri einum vælgerandi endamáli, at ein miðlamaður tók samtaluna upp.
Undir samtaluni spurdi Pelé Diego Maradona um hann kendi Lionel Messi persónliga. Diego Maradona svaraði: - Lionel Messi er eitt gott fólk, men hann hevur onga persónligheit. Hann manglar eginleikarnar, sum krevjast av einum leiðara, segði Diego Maradona við Pelé. Pelé svaraði: Áh eg skilji. Hann er ikki, sum teir vóru í teimum góðu gomlu døgunum. Í Brasil høvdu vit í 1970-unum spælarar, sum Rivellino, Gerson og Tastao. Ikki, sum Argentina í dag, sum eru nógv tengdir at avrikunum hjá Lionel Messi.
Lionel Messi hevur skorað 50 mál í 107 landsdystum fyri Argentina, men aftaná eina tapta HM-finalu í 2014, og eina tapta Copa America finalu í 2015 hevur Lionel Messi ikki sama hetjustatus, sum Diego Maradona, sum gekk á odda, tá Argentina vann HM-gull í 1986. Tað einasta heitið Lionel Messi hevur vunnið við argentinska landsliðnum er OL-gullið Argentina vann í Beijing í 2008.
Um Lionel Messi og Argentina vinna Copa America kappingina, sum er í USA í hesum døgum kann tað tó verða byrjanin til, at Lionel Messi fær ein stjørnustatus í Argentina, sum minnur um tann Diego Maradona hevur í dag.
