Av mongum verður Neistin mett sum besta boðið upp á føroyameistaraheitið í 1. deild hjá monnum. Liðið liggur í løtuni næstfremst, bert tað eina stigið aftan fyri oddaliðið Kyndil, sum Neistin herfyri vann greiðan sigur á. Men nú týðandi og truplir dystir standa fyri framman, noyðist neistavenjarin, Dia Midjord, at ásanna, at nakrir av lyklaleikarunum ikki eru tøkir til nakrar av dystunum.
Dragisa koykt fótin illa
Undir venjing týskvøldið var ein av sterku útlendingunum hjá Neistanum, Dragisa Stojovic, so óheppin at koykja sær fótin. Eftir kanningar á skaðastovuni kundi staðfestast, at talan ikki var um brot ella at nakað liðband var farið, men fóturin er illa koyktur, sigur Dia Midjord. Enn ber ikki til at siga, hvussu lang tíð gongur, áðrenn Dragisa verður tøkur aftur, men neistavenjarin roknar við okkurt um trimum vikum. Harafturat hevur ein annar av stórskjúttunum hjá Neistanum, Heini Hanusarson, aftur fingið trupulleikar við øksluni, og helst er talan um eitt liðband, ið er toygt. Dia Midjord sigur, at verður undir øllum umstøðum ikki við í dystinum móti vestmenningum komandi vikuskifti.
Eitt av álitunum í verjuni hjá Neistanum, er Karl Oddmar Rasmussen, og honum noyðist Neistin at verða fyriuttan í tríggjar vikur, tí hann skal av landinum, so ikki kann sigast annað, enn at neistaliðið er munandi skert næstu leikumførini.
Dia Midjord sigur, at hetta sjálvsagt er ein dyggur smeitur fyri Neistan, men tað er ikki so nógv at gera við tað. Hann hevur ongar ætlanir um at skunda undir at fáa menninar tøkar aftur, tí hann metur tað verða meiri umráðandi, at teir skaddu leikararnir eru púrasta frískir, áðrenn farið verður undir endaspurtin. Hetta loysir seg betur, enn at vit fáa teir tøkar, áðrenn teir eru heilt frískir, tí so kann skaðin koma aftur og gerast enn verri, sigur neistavenjarin at enda.
