Íløgufelagið Royndin avgreiðir nú málið um manningina á trolaranum Topaz. Umboð fyri felagið eru farin til Las Palmas, har skipið liggur -Manningin skal hava sína løn, og tey skulu eisini sleppa til hús. Málið verður avgreitt hesa vikuna, sigur Tummas Eliasen, stjóri í Royndini, við útvarpið hjá Kringvarpinum.
Royndin, sum Lív eigur, hevur gjørt av at gjalda tær umleið tríggjar milliónir krónurnar fyri at fáa tann menniskjansliga partin av málinum av greiddan. Talan er um 80 fólk, sum av fyrstan tíð mannaðu Topaz, harav umleið helvtin er farin til hús aftur.
Bjarti Mohr, reiðari á Topaz, hevur roynt at loyst málið, og hann hevur sagt, at ein loysn var í ljósmála. Tummas Eliasen, stjóri í Royndini vil ikki gera nakrar viðmerkingar til tað, men staðfestir, at Bjarti Mohr higartil ikki hevur klárað at loyst málið.
