Dia Midjord, kringvarpsstjóri sigur, at Kringvarp Føroya hevur ikki pening til at gera upptøkur av dramakonsertini Rósa Maria, sum hevði frumframførslu í kvøld.
Hann sigur, at Kringvarpið fær eina ávísa játtan hvørt ár, sum so skal deilast millum deildirnar á stovninum. Nú er væl liðið út á árið og Dia Midjord dylir ikki fyri, at tað er torførari at finna peningin til slíkar verkætlanir so seint í árinum.
- Vit fingu eisini eina umflokkan herfyri, sum kostar okkum 200.000 krónur eyka í ár, og tað ger tað ikki lættari at finna pening til aðrar verkætlanir, sigur hann og vísir til lønarhækkingina sum tíðindafólk í Starvsmannafelagnum fingu fyrr í heyst.
Hann sigur annars, at tað er ikki óvanligt, at Kringvarp Føroya ger upptøkur av slíkum slag, men tað er als ikki alt, sum verður tikið upp.
