Tveir spennandi dystir hava verið spældir í ensku Premier League í dag. Fyrri dysturin byrjaði klokkan 13:30 sum var millum Chelsea og Arsenal, meðan seinni dysturin byrjaði klokkan 16:00, tá Manchester United tók ímóti Everton á heimavølli.
Í fyrra dystinum millum Chelsea og Arsenal endaði dysturin við 0-0 javnleiki, sum er eitt úrslit, sum gestirnir úr Arsenal kunnu vera betri nøgdir við. Móti endanum av dystinum var Chelsea verjuleikarin, David Luiz, eisini útvístur.
Í seinna dystinum helt góða byrjanin hjá Manchester United uppá Premier League kappingarárið fram. Dysturin, ið annars var rímiliga javnur stóran part av honum, endaði við greiðum 4-0 sigri til Manchester United móti Everton. Manchester United legði seg tíðliga á odda 1-0 við frálíkum máli frá Antonio Valencia, og seinastu 10 minuttirnar í dystinum øktu Henrikh Mkhitaryan, Romelu Lukaku og Anthony Martial til endaliga úrslitið 4-0.
Í dystinum var merkisvert at fyrrverandi Manchester United leikarin og núverandi Everton leikarin, Wayne Rooney, aftur var at síggja á Old Trafford, fyri fyrstu ferð síðani hann í summar skifti millum feløgini. Wayne Rooney fekk góða móttøku á Old Trafford, har hann er mest skorandi leikarin í felagnum nakrantíð.
Úrslitini í dag bera við sær at tey bæði Manchester-liðini – Manchester City og Manchester United – liggja á odda í Premier League eftir fimm umfør. Tey hava bæði 13 stig og sama málmun. Í hølunum á teimum koma meistararnir frá í fjør, Chelsea, sum hava 10 stig.
Úrslitini í Premier League í dag:
Chelsea – Arsenal 0-0 (0-0)
Manchester United – Everton 4-0 (1-0)
1-0 Antonio Valencia, 4.
2-0 Henrikh Mkhitaryan, 83.
3-0 Romelu Lukaku, 89.
4-0 Anthony Martial, 90.
