Tey bæði stóru feløgini í Manchester vóru í eldinum seinnapartin í dag.
Stutt eftir middag smurdi væl upplagda Manchester City á heimavølli Tottenham av. Úrslitið var 6-0!, eftir at City í hálvleikinum var frammanfyri 3-0. Tottenham fjepparar staðfesgta, at liðið ikki er á sama støði, sum tað var síðsta kappingarár, tá ið møguleikin fyri europeisku meistarakappingini leingi var veruligur. Nú verður møguleikin ikki útihýstur, at André Villas-Boas verður sagdur úr starvi. Eingin ivi man vera um, at tað ikki fer at verða góðtikið í framstrembandi høvuðsstaðarfelagnum, um tað verður ov tætt millum avrik og úrslit av tí slagnum, sum sást í Manchester í dag.
Úrslitið kom púra óvart á, tí higartil í hesum kappingarárinum var bara eitt mál farið ígjøgnum hjá Tottenham á útivølli.
Stóru málskjúttarnir hjá Manchester City í dag vóru Jesus Navas úr Spania og Sergio Agüero úr Argentina, sum skoraðu tvey mál í part. Sekundvísarin vísti fjúrtan sekund!, tá ið Jesus Navas skoraði fyrsta málið.
Hjá Manchester United gekk ikki so væl. Tá ið vanliga leiktíðin var farin, var Manchester United frammanfyri 2-1 á útivølli ímóti Cardiff. So javnaði innskifti Bo-Kyung Kim. Eftir eitt korter setti Wayne Rooney hol á fyri United. Fraizer Campbell javnaði eftir stóran hálvan tíma og dygst undan steðginum skoraði Patrice Evra málið, sum leingi sá út til at verða sigursmálið hjá United.
Síðani David Moyes í summar fekk ábyrgdina í Manchester United hevur tað fleiri ferðir kiksað í síðstu løtu, og soleiðis var tað aftur í dag.
Støðan
Arsenal 28
Liverpool og Chelsea 24
Manchester City og Southampton 22
Everton og Manchester United 21
Tottenham og Newcastle 20
Swansea 15
WBA, Aston Villa og Hull 14
Cardiff 13
Norwich 11
West Ham, Stoke og Fulham 10
Crystal Palace og Sunderland 7
