Manchester City er í heimsflokki

Tað er gongd í 24. umfarinum í Premier League í dag. Leicester City hevur við sigri á Liverpool á annað pláss, meðan Manchester City hevut sett seg tungt á fyrsta plássið.

Í kvøld vann Manchester City heili 3-0 á Tottenham. Pep Guardiola og hansara menn spældu avbera væl og hav vunnið 16 dystir upp í slag. Tað skuldi tó eitt umstrítt brotsspark til, fyri at fáa heimaliðið í gongd.

Danski Pierre-Emile Højbjerg bleiv dømdur fyri at fella Ilkay Gundogan, hóast sjónbandamyndirnar vísa at seinnnevndi mundi verða fyrstur at traðka á hin. José Mourinho, venjari hjá Tottenham, helt eftir dystin fyri, at City fekk eitt “nýmótans” brotsspark.

Manchester City hevur havt stórar trupulleikar frá brotssparksblettinum, men hesa ferð skoraði Rodri – akkurát. Hugo Lloris fekk hondina á. Síðani fór Manchester City eitt gear upp og vann dystin trygt. Ilkay Gundogan skoraði tvær ferðir og fór síðani skaddur av vøllinum.

Tað er í løtuni torført at peika á eitt lið, sum er betri enn Manchester City. Liðið hevur vunnið 16 dystir upp í salg og er langt fremst í Premier League. Nú verður spurningurin um góði formurin heldur fram, tá Champions League byrjar.