LANDSLIÐIÐ
Føroyar viga lítið hjá teimum, sum seta altjóða styrkislistan saman. Tað sást á listanum, sum varð kunngjørdur í fyrradagin. Føroyar eru dotnar trý pláss eftir hæli í ein mánað. Tá ið listin fyri mai varð kunngjørdur, vóru Føroyar á 131. plássinum. Nú verður roknað við, at tað eru 133 landslið, sum eru betri enn tað føroyska. Afturgongdin hevur verið støðug síðstu mánaðirnar. Í desember vóru Føroyar átta pláss hægri á listanum, enn tær nú eru.
Tá ið Føroyar vóru hægst á listanum fyri nøkrum árum síðani, var talan um eina støðu á umleið 110. plássinum.
Hvussu nógv fynd er í styrkislistanum hjá FIFA fæst at síggja, tá ið Føroyar 18. august fara at spæla á heimavølli ímóti Malta. Mótstøðuliðið mitt í juli er á styrkislistanum trý pláss omanfyri Føroyar. Malta er farið tvey pláss niður á listanum henda síðsta mánaðin.
Føroyar og Malta spældu tvær ferðir ímóti hvørjum øðrum í 1997. Bæði í Vaduz og á Toftum vunnu Føroyar 2?1. Í báðum førunum var Todi Jónsson annar føroyski málskjúttin. Um alt gongur, sum tað verður vónað, at tað skal gera, so verður Todi í føroyska álopinum 18. august.
Vigaðu lítið
Síðsta ferðin, at Føroyar vóru í altjóða stríði, var í vinardystinum ímóti Hollandi í síðstu viku. Holland vann 3?0, men hetta hevur eftir øllum at døma ikki givið Hollandi størri tyngd í FIFA høpi. Holland hevur leingi verið á fjórða plássinum. Síðani í mai hevur FIFA flutt Holland aftur á sætta plássið. Tað man ivaleyst komast av tapunum á heimavølli ímóti Belgia og Írlandi.
Latínamerika og Europa eru framvegis teir partarnir av heiminum, har bestu landsliðini eru. Brasil er nummar eitt, Frakland er næstovast, so koma Spania og Meksiko, og so er Argentina frammanfyri Holland. Besta asiatiska landið er Turkaland, sum er á sjeynda plássinum. Turkaland verður í fótbóltshøpi roknað at hoyra til Europa. Teir luttaka bæði í Europa Cup og í EM og HM undankappingum í UEFA høpi.
Danmark verður roknað at eiga besta landsliðið í Norðurlondum. Einki serligu úrslitini í síðstu fyrireikingardystunum undan fráferðini til Portugal hava tó kostað hjá Danmark, sum síðsta mánaðin er flutt eitt pláss aftur og nú er nummar fimtan.
Svøríki er flutt trý pláss fram, eftir at teir hava staðið seg væl í vinardystunum. Svøríki er nú nummar átjan. Noreg er nummar 36 og Finnland er nummar 42. Tað svíður rættuliga nógv hjá Íslandi, at teir taptu 6?1 á útivølli ímóti Onglandi.
Tað eru 205 fótbóltstjóðir á listanum, og Montserrat er á aftasta plássinum. Tað er lítið oyggjaland í Karibiska havinum, har fólkatalið liggur um tólv túsund.
