Talvviðmerkjarar kring allan heimin tykjast samdir. Tað verður meiri enn torført hjá indiska Anand at steðga sannførandi Magnusi Carlsen, sum við sigri í 6. umfari í dag í HM finaluni í India av álvara hevur sett kós ímóti heimsmeistaraheitinum. Nú kappingin er hálvrunnin – seks av tólv talvum eru avgreidd – er Magnus Carlsen, sum er føddur 30. november 1990, og harvið verður 23 ár um tvær vikur, frammanfyri 4-2.
Viðmerkjarar halda, at Ciswanathan Anand er sálarliga tyngdur av, at hann nú hevur tapt tvær ferðir á rað. Tað verður sagt, at hann eftir tapið í gjár ætlaði at gera skjótt av í dag, og at remis talvið í dag og hvílidagurin í morgin skuldi menna hann til nýtt álop mánadagin.
Soleiðis gekk tað ikki. Anand gjørdi stórt mistak í endaspælinum, og tað takkaði Magnus Carlsen fyri.
Í finalunum í 2010 og 2012 megnaði Anand at menna seg aftur, eftir at tað í fyrra partinum av kappingini ikki hevði gingið so væl, men soleiðis verður tað ikki roknað við, at tað fer at ganga hesa ferð.
– Tær ferðirnar vóru mótstøðumenninir Veselin Topalov og Boris Gelfand. Tá var tað ikki Magnus Carlsen. Tað er stóri munurin, sigur Susan Ninan, sum viðmerkir í Times of India.
Í morgin er frídagur, og sjeynda umfar verður mánadagin.
