Mikudagur 16. januar er ein dagur, sum seks ára gamli Magnus og foreldrini Lív Durhuus og Jesper Mørch Jensen í Thisted seint fara at gloyma.
Magnus bleiv fyrradagin illa brendur um andlitið, tá eitt av starvsfólkunum í frítíðarskúlanum í Thisted stoytti eldfima vesku á eitt bál, sum eini 10-15 børn stóðu rundan um. Ein eldslogi stóðst av hesum, sum seks ára gamli Magnus fekk í andlitið og bleiv illa brendur.
Sambært yvirlæknanum á deildini fyri brunaskaðar á Ríkissjúkrahúsinum, Bjarne Alsbjørn, hevur Magnus tað hampiligt.
- Hann hevur tað gott. Andlitið er nakað hovið, men soleiðis eigur tað at vera eftir eina slíka hending. Turr skruva fer at koma á, og síðani fer húðin at lekja seg sjálva, sigur Bjarne Alsbjørn við Ekstra Blaðið.
Magnus liggur framvegis á Ríkissjúkrahúsinum í isolatión og verður væntandi innlagdur í minst 12 dagar við brúnasárum í øllum andlitinum. Ikki fyrr enn tá kunnu læknarnir meta, um hann skal hava húðyvirflutning.
Mamma Magnus, Lív Durhuus, ið er úr Vestmanna, er við soninum á Ríkissjúkrahúsinum.
Hon er sum vera man skakað av óhappinum í frítíðarskúlanum, har tey eisini hava fýra onnur børn.
- Eg eri púra skelkað. Tað kann ikki vera rætt, at vit skulu vera bangin um børnini, tá tey eru í frítíðarskúla. Nú hugsa vit um, hvat tað næsta verður, sum fer at henda, sigur Lív Durhuus við Ekstra Blaðið.
Miðlahúsið hevur verið í samband við Lív Durhuus, men hon ynskir ikki at gera nærri viðmerkingar til hendingina enn tað, hon hevur sagt við Ekstra Blaðið.
