Magni Mohr á Setrið

Fróðskaparsetrið hevur sett Magna Mohr í starv sum lektari í heilsuvísindum. Starvið er liður í at menna av heilsuvísindaliga fakøkið á Setrinum

Magni Mohr hevur master- og ph.d.-útbúgving í ítróttarfysiologi frá Keypmannahavnar Universiteti í ávikavist 2001 og 2008.

Hann hevur granskað á University of Exeter, Gøteborg Universiteti og Keypmannahavnar Universiteti.

Ein alment væl kend verkætlan hjá honum í Føroyum er verkætlanin “Svim og spæl”, sum er ein ítróttargranskingarverkætlan, har kvinnur, sum ikki regluliga íðkaðu nakran ítrótt, vórðu kannaðar.
 
Magni er eisini kendur í fótbóltsheiminum, har hann hevur verið knýttur at venjingartoymum hjá stórfeløgunum Chelsea og Juventus.

 
Setrið sigur í tíðindaskrivi, at Magni Mohr er sera virkin í sterkum granskingarnetverkum, og er íðin at miðla sína gransking í m.a. altjóða viðurkendum tíðarritum og í bókum.

Umframt hollar royndir við gransking hevur hann eisini hollar royndir við undirvísing á øllum akademiskum stigum.
 

Magni Mohr byrjar í lektarastarvinum tann 1. august 2014, og fær starvsstað á Sjúkrarøktarfrøðideildini í Jónas Broncks gøtu.