Stjóraskiftið í Atlantsflog kostar føroyska flogfelagnum umleið tríggjar milliónir krónur.
Fráfaringaravtalan tryggjar Magna Arge stjóraløn í tvey ár, eftir at hann er farin úr starvi.
Tað vátta bæði Niels Mortensen og Magni Arge fyri tíðindaportalinum in.fo.
Í gjár skrivaði danska ferðavinnublaðið Travel People, at Magni Arge fær sjey milliónir krónur fyri at fara frá sum stjóri. Talið fór víða um og elvdi til gitingar.
Les eisini: Magni fær sjey milliónir fyri at fara
- Hetta er beinleiðis skeivt, og tí kenni eg meg noyddan at koma við eini rættleiðing, sigur Niels Mortensen.
- Fráfaringaravtalan hjá fyrrverandi stjóranum byggir á løn í tvey ár, sum hann hevur rætt til sambært setanarsáttmálanum, sigur Niels Mortensen
Nevndarformaðurin leggur tó samstundis dent á, at tølini ikki verða latin almenninginum, tí talan er um trúnaðarviðurskifti í einum setanarsáttmála og eini fráfaringaravtalu.
Sambært roknskapinum hjá Atlantsflog fyri 2012 var samlaða inntøkan hjá Magna Arge stívliga 1,6 millión krónur í fjør, alt íroknað. Sambært roknskapinum var sjálv lønin 1.157.000 krónur, eftirlønin var 171.000 krónur og harumframt fekk Magni Arge 230.834 krónur í bonus.
Les eisini:
Onga viðmerking til fráfaringaravtalu
Magni fær sjey milliónir fyri at fara
Johan Dahl stuðlar nevndini í Atlantsflog
Lasse Klein: Nevndin má forklára seg
Nevndarformaðurin: Atlantsflog tørvar nýggja strategi
Magni Arge fortíð í Atlantsflog
