Stutt eftir kl. átta sunnukvøldið royndi ein 26 ára gamal maður at seta eld á bilarnar, sum stóðu parkeraðar á Skálatrøð í Havn. Tað eydnaðist honum at bróta inn í ein bil og at seta eld á forsetrið. Løgreglan kom á staðið, áðrenn størri skaði stóðst. Eldáseting er eitt rættiliga álvarsligt mál og tí er málið sent kriminalløgregluni til víðari kanningar.
Beint framman undan henda tilburðin, um hálvgum sjey tíðina, hendi eitt ferðsluóhapp í R.C. Effersøesgøtu. Ein bilur kom koyrandi oman eftir vegnum og gloymir eftir øllum at døma allar galdandi ferðslureglar, tá ið hann skal snara til høgru og inn á økið hjá SMS. Ein annar bilur kemur fyri og bilarnir stoyta saman. Alt av ósketni og broti á allar ferðslureglar. Stoyturin var so mikið stórur, at bilarnir máttu sleipast burtur. Eingin fólkaskaði var.
Rúsdrekkakoyring
Um vikuskiftið vórðu tveir menn handtiknir í Havn fyri at hava koyrt við kenning. Tann fyrri ein 36 ára gamal maður varð handtikin fríggjadagin seinnapartin og tann seinni ein 44 ára gamal maður seinni sama seinnapart.
Beint eftir klokkan 16 fríggjadagin seinnapartin var ein harmonikusamanstoytur við fótgangarateigin við Apotekið í Havn. Ein bilur steðgaði fyri einum fólki, sum fór yvir um fótgangarateigin, men steðgurin hevur eftir øllum at døma verið so bráður, at bilarnir, ið koyrdu aftaná ikki kláraðu at bremsa. Eingin fólkaskaði stóðst av óhappinum, bert smærri skaðar á allar tríggjar bilarnar í stoytinum.
Náttina til leygardagin var ein 20 ára gamal maður handtikin, tá ið hann var við at bróta inn á Sjómansheimið í Havn. Áðrenn handtøkuna hevði hann gjørt um seg fyrst í Steinatúni, har hann gjørdi herverk inn á ein hýruvogn og seinni á parkeringsøkinum við Sjómansheimið, har hann hevði blakað málingablikk av brandtrappuni niður á nakrar parkeraðar bilar.
Nakað seinni hesa somu náttina vóru tveir unglingar, ein 15 ára gamal og ein 17 ára gamal, handtiknir, tá ið teir vóru við at bróta inn í kaffivognin á kajini. Teir vórðu steðgaðir áðrenn teimum eydnaðist at koma inn.
Friðarligt vikuskifti
Aðra staðni í Føroyum frættist ikki um nakað óvanligt. Tvey smærri ferðsluóhapp vóru í Eysturoynni, eitt við tunnilsvegin til Funningsfjørð og eitt millum Skála og Skálabotn, bæði við smærri materiellum skaða. Fyrrakvøldið varð ein ær yvirkoyrd.
Í Suðuroy var eitt stórt tiltak leygarkvøldið, tá um 450 ungfólk vóru til Ársins Songrødd. Hesi hálvvaknsu skikkaðu sær væl, frættist úr Suðuroy.
