Sambært Rigmor Dam mátti hon fara av fundinum, tí hon hevði barnaføðingardag heima við hús.
Orðaskiftið um blokkin dró so nógv út, at hon ikki náddi málið um kringvarpsskattin. Hóast talan var aðru viðgerð, so brúktu tingfólk fleiri tímar um at togast um framtíðarstøðu Føroya í ríkinum.
– Eg avtalaði við Gunvør Balle, at hon tók sær av málinum. Síðani clearaði eg við Helga Abrahamsen, sigur Rigmor Dam.
Sambært Bjørt Samuelsen, so noyddist eisini hon av fundi meginpartin av hósdegnum av privatum orsøkum.
– Eg clearaði við Elsebeth Mercedis, sigur hon.
Hetta við at tingfólk »cleara« merkir eftir øllum at døma, at ein sum atkvøður fyri einum máli avtalar við ein, sum atkvøður ímóti, at viðkomandi ikki atkvøður fyri at uppviga tann, sum ikki møtir á tingi.
Sosialurin hevur fyrr spurt tingformannin um, hvussu henda clearing-skipan er samansett, men tingformaðurin kennir einki til nakra slíka avtalu.
– Tað er trupult at taka inn varafólk í slíkum støðum, tí kravið er jú at man fer minst eina heila viku í farloyvi, sigur Bjørt Samuelsen.
