Trolbáturin Dýrindal verður nú seldur á tvingsilssølu. Sambært skipaskrásetingini eigur P/f Brimborg í Vági skipið. Skipið skal seljast á tvingsilssølu á Dómaraskrivstovuni mikudagin 18. mars klokkan 13.15.
Dýrindal er ein av trolbátunum í bólki 4T, ið hava loyvi at trola á landleiðini. Skipið er bygt á Ósey í Íslandi í 2002, er 19,35 metrar til longdar og 78 bruttotons.
Skipið var í 2012 keypt úr Haraldssundi suður til Vágs. Byrjanin hjá skipinum var tó ikki av teimum bestu, og fyrstu tíðina lógu teir nógv við bryggju. Fyrst orsaka av trupulleikum við motorinum, síðani av tí, at illa gekst at manna skipið.
Nú letur so til, at ævintýrið í Vági er av á hesum sinni.
