Fótbóltur
Týskvøldið einsamalt gjørdist tað málríkasta í søguni hjá Champions League. Tá fullu 36 mál í teimum átta dystunum, og tó at mikukvøldið ikki varð fult so hendingaríkt, so var samlaði totalurin nóg mikið til væl og virðiliga at fylla goal-show’ið, sum Viasat sendi mikukvøldið.
Nú bólkaspælið er komið í helvt, eru fleiri lið, ið longu mest sum hava vissað sær víðari atgongd í kappingini. Í øllum førum skal nógv ganga galið, um Barcelona, Manchester United, Villarreal, Bayern München, Juventus og Real Madrid ikki spæla seg víðari í kappingini.
Ikki minst er merkisvert, at spenningurin í bólki H ikki er størri enn tað sama. Her varð roknað við, at Zenit Petersborg veruliga skuldi hótta stóru Juventus og Real Madrid, men við einum stigi fyri tríggjar dystir hava UEFA-Cup meistararnir mest sum útspælt sín leiklut longu nú. Og ikki minst var talan um stórt vónbrot, tá teir bert spældu javnt móti hvítarussiska Borisov.
Javnt í Madrid
Stóri dysturin í gjárkvøldið stóð millum Atletico Madrid og Liverpool, og tann dysturin endaði við einum máli til hvønn partin.
Liverpool kom annars á odda tíðliga í dystinum við máli frá Keane, men Simao javnaði, tá sjey minuttir vóru eftir at spæla. Atletico hevði eisini bóltin í netinum eina aðru ferð, men ta ferðina helst linjudómarin onkursvegna, at Maniche var rangstaddur.
Og so gjørdist mikukvøldi eisini kvøldið, tá lítla Anorthosis Famagusta fyri fyrstu ferð tapti í Champions League, men 0-1 í Milano móti Inter er væl og virðiliga til at liva við hjá oyggjabúgvunum, sum enn eru á einum mest sum sensationellum øðrum plássi í sínum bólki.
---
Úrslitini
Bólkur A
Bordeaux-CFR Cluj 1-0
Chelsea-Roma 1-0
Bólkur B
Inter-Anorthosis 1-0
Panathinaikos-Werder Bremen 2-2
Bólkur C
Shakhtar D.-Sporting L. 0-1
Basel-Barcelona 0-5
Bólkur D
Atletico Madrid-Liverpool 1-1
PSV Eindhoven-Marseille 2-0
Bólkur E
Villarreal-AaB 6-3
Manchester Utd—Celtic 3-0
Bólkur F
Bayern München-Fiorentina 3-0
Steaua Bukarest-Lyon 3-5
Bólkur G
Fenerbache-Arsenal 2-5
Porto-Dynamo Kiev 0-1
Bólkur H
Juventus-Real Madrid 2-1
Zenit Petersborg-Bate Borisov 1-1
