Talan er um 35 málráð, sum hava verið prentað í Sosialinum í 35 vikur í ár. Tað er eitt samstarv millum Orðafragd v/ Marjun Arge Simonsen, cand.phil, og Sosialin. Samstarvið kom í lag eftir kjak millum starvsfólk í Miðlahúsinum og Marjuna um mál – tá hugskotið spratt, hví hon ikki bara skrivaði nøkur málráð við jøvnum millumrúmum.
Sosialurin hevur fyrr havt málteig. Fyrstu árini var tað Svenning Tausen, sáli, sum skrivaði, og tey komu eisini út í bók. Seinni var tað André Niclasen, sáli, sum skrivaði, men málteigurin datt niðurfyri fyri skjótt mongum árum síðani.
Tað kom tí væl við hjá Sosialinum, at Marjun Arge Simonsen í eitt tíðarskeið vildi átaka sær uppgávuna, sum hon greiddi sera væl.
Tað bleiv í fyrsta umfari til 35 málráð.
Marjun Arge Simonsen hevur cand.phil.-prógv í norðurlendskum, serstakliga føroyskum, máli og bókmentum. Hon starvast í egnum virki, Orðafragd, har hon veitir málsliga ráðgeving, týðir, rættlesur og hevur skeiðvirksemi. Hon hevur stóran áhuga fyri málrøkt, sum er tann partur av málfrøðini, har ið miðað verður ímóti at røkja og halda einum máli uppi. Harumframt er meginhugsanin, at málið skal mennast við at byggja á tann grundvøll, ið málið er sprottið úr.
Málrøkt miðar eisini ímóti at stimbra málkensluna hjá fólki, so samskiftið verður greitt, og tað slepst undan misskiljingum.
Hesi málráð eru skrivað við tí í hyggju at veita ráð til teirra, ið fegin vilja vita, hvat ið er rætti hátturin at orða seg. Marjun hevur eisini stóran áhuga fyri orðabókafrøði og navnafrøði sum granskingarevni. Nakrar av greinum hennara eru at finna á ordafragd.com
