Tá B68 sunnudagin á Toftum vann 1-0 á EB/Streymi og 07 Vestur mánakvøldið í Fuglafirði vann 2-1 á ÍF, vóru hetta nokk ikki akkurát tey úrslitini, tey flestu høvdu roknað við. Hetta vóru í báðum førum dystir í Vodafonedeildini, sum góvu trý týdningarmikil stig, men samstundis vóru hetta aðalroyndir undan fyrru hálvfinalunum í kappingini um Løgmanssteypið, sum verða í kvøld.
Og hálvfinalurnar bjóða júst somu dystir, tí klokkan 18.30 byrjar dysturin í Fuglafirði millum ÍF og 07 Vestur, og klokkan 19 spæla B68 og EB/Streymur á Toftum. So er spurningurin, um úrslitini verða tey somu, sum í landskappingardystunum, ella um tey bæði liðini, tey flestu rokna sum favorittar, fara at standa seg betur í kvøld.
At ÍF tveir heimadystir á rað hevur tapt fyri teimum báðum lægstu liðunum í Vodafonedeildini, er sjálvandi ikki gott, men hinvegin er liðið hjá 07 Vestur er kanska ikki so vánaligt, sum plássið á stigatalvuni sigur. Tí verður tað annaðhvørt greiður ÍF-sigur ella ein javnur og opin dystur.
Hóast EB/Streymur við sínum drúgvu steyparoyndum má sigast at vera favorittur á Svangaskarði í kvøld, er B68-liðið við at fóta sær av álvara. Og havandi í huga, at B68 saktans kundi vunnið nógv meira enn bara 1-0 sunnudagin, má roknast við einum púra opnum dysti, har alt kann henda.
Seinnu hálvfinalurnar verða spældar týsdagin 14.juni, og sjálv finalan í kappingini um Løgmanssteypið verður í Klaksvík fríggjadagin 5. august.
