Fult umfar er í næstbestu fótbóltsdeildini seinnapartin. NSÍ og KÍ kappast um oddasessin. Í dag fáa teir næstbestu hjá NSÍ vitjan av teimum næstbestu hjá HB, sum við sigri hevur møguleika at blanda seg í toppstríðið. Tann dysturin verður, tá ið oyggjauppgerðin í bestu deildini millum NSÍ og ÍF verður liðug.
Tveir dystir vera í Gundadali klokkan 16.00. KÍ er gestur á niðara vølli hjá Giza Hoyvík, sum higartil hevur vunnið tveir dystir – 5-2 á heimavølli ímóti B36 og síðsta leygardag 3-0 á útivølli ímóti ÍF.
Á ovara vølli í Gundadali verður botnuppgerð millum B36, sum higartil hevur vunnið fýra stig, og ÍF sum einki stig hevur vunnið.
Víkingur er í Suðuroy, har fyrsta bríkslið á Vágseiði verður klokkan 15. Víkingur er á sætta plássi við tólv stigum, og Suðringar eru á sjeynda plássi við tíggju stigum.
AB og B68 eru tey bæði liðini, sum tykjast hava møguleika at vera við í kappingini um heiðursmerkjaplássini og harvið møguleikan at flyta upp. Hesi bæði liðini hittast á Argjum. Bæði liðini hava fimtan stig, men AB hevur spælt ein dyst fleiri enn B68.
Fyri einari viku síðani vunnu bæði liðini á heimavølli. B68 vann 3-0 ímóti toppliðnum NSÍ, meðan AB vann 2-0 ímóti Suðringum.
1. deild
Níggjunda umfar
Ídag
NSÍ-HB: Suni Fríði Johannesen kl. 17.30
TB/FCS/Royn-Víkingur: J. Hendrik Ellefsen kl. 15.00
Giza Hoyvík-KÍ: Dagfinn Forná kl. 16.00
AB-B68: Bjarki Danielsen kl. 15.00
B36-ÍF: Janus Fossdalsá kl. 16.00
Støðan undan níggjunda umfari
NSÍ 19 stig
KÍ 18 stig
AB 15 stig
B68 15 stig
HB 14 stig
Víkingur 12 stig
TB/FCS/Royn 10 stig
Giza Hoyvík 8 stig
B36 4 stig
ÍF 0 stig
NSÍ og ÍF hava spælt níggju dystir, B68 og Giza Hoyvík hava spælt sjey dystir, og hini liðini hava spælt átta dystir
