Hann hevur havt eitt framúr gott kappingarár. Tað bleiv dyggiliga staðfest til atkvøðugreiðsluna, sum feløgini avgreiddu undir steypakappingini. Tað var als eingin ivi um úrslitið, Luitjen fekk 88% av atkvøðunum, skrivar Talvsambandið í tíðindaskrivi.
Hann hevur verið virkin í flest øllum kappingum í føroyskari telving. Bæði í barna- og ungdómskappingum hevur hann verið frammaliga, í liðkappingini hevur hann telvað sannførandi fyri Havnar Telvingarfelag, og til FM á páskum vann hann sannførandi 1. bólk.
Harumframt vann Luitjen silvur í norðurlandakappingini, sum varð hildin í Íslandi í februar. Og sum yngsta umboð nakrantíð, var Luitjen við á landsliðnum, sum luttók í EM fyri smátjóðir (San Marino).
Á ratinglistanum hevur Luitjen eisini gjørt skarðslop, og er nú nummar 25 í Føroyum.
##med2##
Ársins stjørnuskot
Benjamin Reinert Fjallheim varð kosin ársins stjørnuskot, og hóast ungan aldur, so hevur hann verið virkin í fleiri ár. Tað er sannuliga eisini uppiborið, at hann fekk heiðurin í ár.
Við greiðum meiriluta valdu feløgini Benjamin, sum fekk 64% av atkvøðunum.
Benjamin hevur verið virkin í øllum heimligum kappingum. Telvaði eitt sera gott NM, hóast sterka mótstøðu. Varð føroyameistari í unglingum á páskum, og hevur eisini telvað fleiri kappingar uttanlanda. Serliga saman við Leif og Elmar; beiggja og pápa.
