Tað er blivið alsamt meira vanligt, at føroyingar senda tær sokallaðu kinesisku pappírslampurnar upp í luftina, tá eitt nú brúdleyp ella rundir føðingardagar eru á skránni.
Tíverri kemur meir enn so fyri, at fólk ikki boða politinum frá hesum frammanundan, og tískil er meir enn so komið fyri, at onnur fólk ringja ørkymlað til politiið fyri at boða frá um tey heldur serligu ljósini á luftini.
- Tað kemur fyri, at fólk brúka hesar pappírslampurnar, men tá vilja vit ógvuliga fegin hava, at fólk boða okkum frá hesum í góðari tíð, og so meta vit, um loyvið skal gevast til at senda pappírslampurnar upp, sigur vakthavandi í politistøðini.
Vakthavandi leggur afturat, at í sambandi við eitt brúdleyp í Havn í kvøld er loyvið givið til at senda upp fleiri kinesiskar pappírslampur.
