Lomvigin er taldur tríggjar ferðir í Føroyum, og hesar teljingar vísa, at stovnurin er minkaður nógv, síðan hann fyrstu ferð var taldur í 1972. Tá var samlaða talið av lomviga, sum sat í bjørgunum 587.000.
Í 1987 vóru 312.000 lomvigar. Seinast hann var taldur frá 1997 til 1999, var talið komið niður á 252.000.
Komandi ár verður ein nýggj teljing gjørd av øllum lomvigunum í Føroyum. Tá verður møguligt at síggja, um tað framvegis gongur niðureftir við lomvigastovninum.
Í Skúvoy verður lomvigin taldur á hvørjum ári, so hetta kann geva eina ábending um, hvussu nógvur fuglur er í landinum, og har er bæði gingið upp og niður aftur, síðan talt var um alt landið seinast. Fram til 2000 gekk uppeftir, tá vóru 6133 lomvigar í Høvdanum í Skúvoy. Síðan tá er talið aftur minkað til í ár, tá talið var 3895. Flest lomvigar vóru í Høvdanum í Skúvoy í 1973, tá 9674 fuglar sótu í bjørgunum.
Størsta grundin til, at lomvigastovnurin minkar er, at føðigrundarlagið er ov vánaligt og ov óstøðugt. Lomvigi livir av nebbasild og hvítingsbróðri, og nøgdin av hesum fiskasløgum er sera skiftandi, men ongar ítøkiliga mátingar eru gjørdar av, hvussu stórur føroyski stovnurin av nebbasild er.
Aðrar umstøður kunnu eisini ávirka hvussu lomvigastovnurin hevur tað, bæði veðrið og hvussu fuglurin hevur haft tað um veturin, tá hann heldur til fram við norsku strondini.
- Tá tað gongur illa við lomvigastovninum í Føroyum, sæst tað aftur við, at ongir pisur koma undan, tí tað ikki er nóg mikið av føði, sigur Bergur Olsen, á Fiskirannsóknarstovuni.
- Tað stóð ringast til hjá lomviganum beint undan kreppuni í 1990, samstundis sum ringast stóð til hjá toskastovninum. Hetta hongur saman við, at bæði toskur og lomvigi liva av nebbsild, greiðir Bergur Olsen frá.
