Heimasíðan hjá HB ivast í øllum førum ikki.
– Tað er einki at taka seg aftur í, at ávirkanin at hava Hans á liðnum var sjónlig. Har var meira friður á, og miðverjarnir báðir spældu ein fínan dyst, skrivar hb.fo.
36 ára gamli verjuspælarin var við í hópinum fyri fyrstu ferð í hesum kappingarárinum. Hans á Lag hevur raðfest privatlívið hægri seinastu vikurnar, men hann hevur vant við besta liðnum síðsta mánaðin. Nú er hann so mikið væl fyri, at Julian Hansen, venjari, sendi boð eftir honum. Marcin Dawid loysti eisini av Heðin Stenberg sum málverja. Pólski málverjin noyddist hinvegin av vøllinum við skaða í seinna hálvleiki, og tá slapp Stenberg aftur at royna seg.
Føroyameistararnir hava verið lítið støðugir seinastu vikurnar. HB hevði tapt 1-4 fyri B36 og KÍ undan vitjanin á Sandi. Við verjukempuni á liðnum eydnaðist tað loksins aftur at fáa trý stig í skjáttuna.
Veteranarnir skoraðu
Tað kom einki mál undan steðginum. Tað var fyrstu ferð í hesum kappingarárinum, at Símun Rógvi Hansen, málverji hjá B71, ikki noyddist í meskarnar eftir bóltinum fyrstu 45 minuttirnar. HB fekk tvey mál í seinna umfarinum, og í báðum førum vóru tað veteranar, sum vóru málskjúttar. Andrew av Fløtum sendi gestirnar á sigurskós, og Fróði Benjaminsen staðfesti sigurin, tá hann tók av møguleikanum eftir brotsspark.
HB var meira á bóltinum, meðan sandoyingar tóktist fremst av øllum hugsa um at fáa eitt stig. B71 royndi at trýsta seinastu løtuna, men føroyameistararnir høvdu tamarhald á støðuni. Bogi Hermasen, B71, var útvístur, tá átta minuttir restaðu í av dystinum.
Ein lætti
Tað var ein stórur lætti fyri føroyameistararnar, at tað eydnaðist at vinna hesaferð. Venjarin ásannaði síðsta vikuskiftið, at úrslitini hava ikki verið nøktandi, og hann var undir trýsti. Sigrar geva altíð sjálvsálit, og tað er umráðandi at hava við sær, tá B68 vitjaði í Gundadali um tvær vikur.
