Sands bygdarráð hevur samtykt, at garður skal laðast um lendið, sum er velt og drenað til nýggjan kirkjugarð á Sandi.
Tað var Finnleif Fagradal, sum stóð fyri at gera lendið klárt til kirkjugarð.
Sambært samtyktini í bygdarráðnum skal nýggi kirkjugarðurin hava somu hædd sum hin verandi. Hann skal verða slætt laðaður á báðum síðum og hava tvey portur.
- Ætlanin er at skipa arbeiði soleiðis, at tað verður lokal arbeiðsmegi úr Sandoynni, sum kemur at laða garðin, og ætlanin er at fara til verka sum skjótast.
Í skrivi, sum er sent í hvørt hús á Sandi, sigur kommunan, at sóknast verður nú eftir egnaðum fólki, ið bjóðar seg fram at laða garðin.
Sum skilst, fer hetta arbeiði væntandi at kosta einar 600.000 krónur.
