Løgtingið nokta bankum at taka ómaksgjald

Bankar skulu ikki hava loyvi til at taka ómaksgjald frá fólki, bara fyri at hava eina kontu í bankanum.

Tað heldur Javnaðarflokkurin.

Nú hevur Eyðgunn Samuelsen lagt uppskot fyri Løgtingið um at samtykkja, at tað skal vera ókeypis hjá fólki at hava kontu í bankunum.

Bankin skal heldur ikki hava loyvi til at taka ómaksgjald frá fólki fyri at avrokna skatt ella fyri at lata fólk taka pening av eini lønarkontu.

Eyðgunn Samuelsen vísir á, at nú ber til at avgreiða næstan øll bankaviðurskiftini av eini teldu heima við hús.

- Beinleiðis sambandið við bankan er nógv minkað og bankarnir hava samstundis minkað talið av avgreiðslum.

Fyrr vunnu bankarnir pening við at hana mun á innlánsrentu og útlánsrentu.

- Men í dag taka bankar eisini ómaksgjald frá viðskiftafólkunum fyri alskyns tænastur.

- Samstundis noyðast fólk at hava lønarkontu í bankanum, sigur hon.

Men hon heldur samstundis, at fólk skulu kunna fáa sína løn á eina kontu, og at kunnu taka pening av hesi kontu, uttan at skula gjalda fyri tað.

- Tað er ikki rímiligt, at ein vanligur løntakari skal gjalda fyri eina tænastu, sum lógin áleggur honum at hava, sigur Eyðgunn Samuelsen.