Fyrsta umfar í landskappingini hjá kvinnum var í gjár, og gjørdist talan um tríggjar útisigrar. Tann fyrsti dysturin var í Gundadali tíðliga seinnapartin millum uppflytararnar úr B36 og greipuvinnararnar úr KÍ. Tað endaði við, at KÍ vann dystin 3-0.
Longu í sjeynda minutti brendi Rannvá Andreasen brotsspark, men hon gjørdi tað gott aftur, tá hon í seinna hálvleiki skoraði til bæði 2-0 og 3-0 – fyrst við einum langskoti og síðani einum skallara. Málið, sum legði KÍ á odda stutt undan steðginum, fekk Malena Josephsen eftir hornaspark.
Gjørdi skjótt av
AB, sum í fjør vann silvur, gjørdi skjótt av og legði botnin undir útisigurin á Víkingi í fyrra hálvleiki, tí tá dysturin í Gøtu var komin í helvt, var longu 3-0 til AB. Hellen Haraldsen, Doris í Garði Joensen og Olga Kristina Hansen syrgdu fyri málunum.
Eftir steðgin var dysturin munandi javnari, og Anna H. Joensen skoraði fyri Víking næstan beinanvegin. Men ímóti endanum fekk AB tvey mál innan fyri fimm minuttir til 5-1, sum Mona Breckmann og Lisa í Liða skutu, áðrenn Jóhanna B. Fuglø í yvirtíðini gav Víkingi eitt troystarmál, so dysturin endaði 5-2 til AB.
HB kløkkaði Skála
Hóast ikki færri enn fýra av spælarunum hjá Skála høvdu spælt hondbóltsdystir bæði leygardagin og fyrr um dagin í gjár, megnaðu bronsuvinnararnir av Skála at vinna 1-0 á uppflytarunum úr HB. Tað var tó um reppið, at vertirnir komu á odda við brotssparki eitt korter inn í dystin, men Helen á Lakjuni, sum í summar hevur skift flogbóltin út við ein málmanskjans í fótbólti, tók brotssparkið hjá Mariannu H. Jacobsen.
Bara fýra minuttir seinni kom hinvegin mál í hinum endanum, sum Bára Berthelsen skoraði, so Skála legði seg á odda 1-0. Í fyrra hálvleiki vóru bæði liðini væl við, men í undanvindinum eftir steðgin royndist Skála betri og helt væl og virðiliga fast um leiðsluna, til liðugt var.
hilmarjan@sosialurin.fo
