Fyri viku síðani vóru tríggir dystir spældir í innleiðandi umfarinum í ársins útgávu av kappingini um Løgmanssteypið, og um vikuskiftið er so klárt at fara undir fyrsta umfar, ið tilsamans fevnir um átta dystir og tískil eins væl kundi itið áttandapartsfinalur. Nú koma eisini øll tey bestu liðini við, so sum Vodafoneliðini og tey fremstu í næstbestu deildini.
EB/Streymur, sum vann steypakappingina í fjør, skal spæla sín fyrsta dyst á útivølli ímóti B36, men tann dysturin verður ikki fyrr enn sunnudagin. Allir hinir dystirnir eru leygardagin, og tá eru eisini tvær aðrar uppgerðir millum tvey Vodafonelið, tí HB spælir ímóti Víkingi og NSÍ ímóti B71. Annars eru hinir dystirnir í fyrsta umfari millum lið í Vodafonedeildini og lægri lið, men tó er eitt undantak, sum er dysturin millum AB og TB, ið kundi verið ein forsmakkur upp á oddastríðið í næstbestu deildini.
Vinnandi liðini um vikuskiftið koma í fjórðingsfinalurnar, sum verða spældar mikudagin 4. mai.
Hálvfinalurnar verða spældar ávikavist hósdagin 19. mai og týsdagin 14. juni, og sjálv steypafinalan verður eftir skránni spæld fríggjadagin 5. august.
