Uppsagnir
Mánadagin fingu øll arbeiðsfólkini hjá MBM-Kjøti í Hósvík at vita, at tey eru uppsøgd sambært galdandi sáttmálum.
Eirikur Thorvaldsson, stjóri á MBM, sigur, at hetta í fyrsta lagi er ein formell uppsøgn, nú arbeitt verður við eini umlegging av virkseminum hjá virkinum.
- Uppsøgnirnar merkja ikki, at virksemið hjá MBM-Kjøti heldur uppat. Vit
hava gott fólk í Hósvík og gongur alt, sum ætlað, vænti eg, at øll verða sett aftur í starv, tá ið umleggingin er framd; tí fara vit eisini heilt skjótt at kunna fólkið um, hvat tey kunnu vænta sær.
Á MBM-Kjøti er eisini ein slaktaralærlingur, men hann er ikki uppsagdur.
Eirikur sigur, at MBM hevur valt at geva arbeiðsfólkinum ávikavist 3 og 4 mánaðar uppsagnartíð ? alt eftir, hvussu leingi tey hava verið í starvi hjá felagnum.
Konseptið er
ikki nóg gott
Stjórin vísir á, at ein umlegging er neyðug, tí virksemið hongur ikki saman sum er. Ætlandi verður henda umlegging liðug um ársskiftið.
- Vit hava nú brúkt seks ár at byggja hetta virksemi upp, men kappingin frá
eitt nú Krás og Miklagarði er ógvuliga hørð. MBM-Kjøt hevur havt undirskot á hvørjum ári, og í ár verður talan um eina miljón, tá ið alt er tikið við.
Eirikur sigur, at MBM hevur hjálpt virkinum í Hósvík at fóta sær, og hann
heldur einki skeivt vera í, at hetta er gjørt.
- Men seks ár er long tíð og tá ið tað, tú gert, ikki gongur í longdini, er neyðugt at gera okkurt annað. Tað er hetta, vit fara at gera nú. Konseptið er ikki nóg gott og má broytast, sigur hann.
Stjórin vil ikki siga nágreiniliga, hvussu virksemið hjá MBM-Kjøti verður í
framtíðini, men hann vísir kortini á, at tað eru framleiðslur, sum geva meira og aðrar, sum geva minni.
- Vit fara so í fyrsta lagi at leggja okkum eftir teimum framleiðslum, sum geva avkast.
Serliga neytini
Eirikur sigur, at tað primera hjá MBM-Kjøti øll árini hevur verið føroysku neytini og góðskingin av neytakjøti. Fyri 2-3 árum síðan fór MBM eisini at keypa neytakjøt úr Danmark, sum eisini hevur verið brúkt í framleiðsluni av lidnum vørum. Aftrat neytakjøti, hevur MBM keypt nakað av grísakjøti úr Danmark.
Spurdur, hvønn týdning seyðurin hevur um heystarnar, sigur Eirikur, at hetta hevur meira at kalla verið ?hobby? aftrat tí, sum hevur verið frammanundan, tí tíðarskeiðið, seyðurin verður flettur, er so stutt.
Stjórin sigur, at henda støðan á MBM-Kjøti er so nýggj, at teir enn ikki hava kunnað Poul Michelsen, sum selir framleiðsluna fyri virkið í Hósvík, um uppsagnirnar.
- Gongur alt, sum ætlað, hava vit eitt nýtt konsept í Hósvík um ársskiftið, sigur
Eirikur Thorvaldsson, stjóri á MBM, at enda.
:
