Liverpool takkar fyri seg í meistarastríðnum

Fimm dystir vóru í gjárkvøldið í 22. umfari í Premier League. Í øllum fimm dystunum vann útiliðið. Manchester City staðfesti enn eina ferð, at liðið er til reiðar at stinga av, meðan kreppan í Liverpool vísti seg aftur.

Liverpool hevði vitjan av Brighton á Anfield. Undan seinasta dystinum á Anfield hevði Liverpool ikki tapa á heimavølli í 68 dystir. Tá tapti Liverpool 1-0 móti Burnley og øll róptu kreppa. Síðani vann Liverpool 3-1 á bæði Tottenham og West Ham á útivølli, men í gjár vóru krepputeknini aftur at síggja.

Liverpool hevur bóltin nógv, men uttan Sadio Mané var eingin hóttan í álopsstøðu. Tað endaði við, at Brighton vann uppiborið 1-0. Hetta er fyrsti sigurin hjá Brighton móti Liverpool síðani 1982, og fyrstu ferð síðani 1984, at Liverpool ikki hevur skorað í trimum dystum upp í slag á heimavølli.

Liverpool, sum hevur spælt ein dyst fleiri, er nú sjey stig aftanfyri oddaliðið Manchester City, sum vann 2-0 á útivølli móti Burnley. Gabriel Jesus og Raheem Sterling skoraðu málini. Sunnudagin møtast Liverpool og Manchester City.

Leicester City hevur yvirhálað Liverpool og er á triðja plássi, eftir ein 2-0 sigur á Fulham. Everton reisti seg eftir ósigurin móti Newcastle, og vann 2-1 í Leeds. West Ham heldur fram at leggja trýst á top fýra. David Moyes og hansara menn vunnu 3-1 á útivølli móti Aston Villa.

Seinasti dysturin í 22. umfari verður í kvøld, tá Tottenham fær vitjan av Chelsea.