Liverpool gjørdi tað aftur

Liverpool hevur aftur í kvøld vunnið ein dyst í hesum kappingarárinum. Liverpool vann 2-1 á Wolverhampton og hevur nú vunnið 22 av 23 dystum í Premier League. Jordan Henderson og Roberto Firmino skoraðu málini.

Eins og móti Manchester United, fekk Liverpool ein góða byrjan upp á horna. Aftur var talan um hornapark úr høgru. Hesa ferð var tað liðskiparin, Jordan Henderson, sum setti høvdið á við nærmastu stong.

Tað er ein strika í rokningini hjá Liverpool, at Sadio Mané mátti av vøllinum við nøkrum sum líkist einum vøddaskaða. Fyrstu útmeldingarnar eru at Sadio Mané føldi eitt sindur til eina fipur, og valdi at lata seg skifta út. Helst er talan ikki um longri steðg verður sagt.

##med2## 

Í seinna hálvleiki tók Wolverhampton yvir. Liverpool hevði møguleikar at økja, men leikliga setti heimaliðið Champions League vinnararnar undir trýst. Tað endaði við at Adama Traore rann frá verjuni og legði bóltin beint á høvdið hjá Raul Jimenez, sum hegnisliga stútaði bóltin í málið.

Eina løtu sá út til at Liverpool fór at missa stig, fyri fyrstu ferð síðani málleysa javnleikin á Old Trafford. Men fáar minuttir fyri tíð endaði bólturin fyri føturnar á brasilska Roberto Firmino, sum sendi bóltin í málið úr 10 metrum ella so. 

##med3##

Liverpool hevur nú 67 av 69 møguligum stigum í hesum kappingarárinum. Tað eru 16 stig niður til nummar tvey, Manchester City, sum hevur spælt ein dyst fleiri. 

Premier League 24. umfar:

AFC Bournemouth- Brighton 3-1

Aston Villa – Watford 2-1

Crystal Palace – Southampton 0-2

Everton – Newcastle 2-2

Sheffield United – Manchester City 0-1

Chelsea – Arsenal 2-2

Leicester City – West Ham 4-1

Tottenham – Norwich 2-1

Manchester United – Burnley 0-2

Wolverhampton – Liverpool 1-2