Nú í nøkur ár hevur verið skipað fyri páskaframsýningina í Skúlanum við Gøtugjógv. Framsýningin lat upp páskadag kl. 16 og hevur so verið opin í dag, 2. páskadag eisini kl. 16 - 19.
Tey, ið sýna fram, eru øll búsitandi í Gøtu og við ættarbondum, tó ikki Tummas Jákup Thomsen.
Elisabeth Maria Pálsdóttir – Tekningar og málningar
Jens Klæmint Jacobsen – Tekningar og skulpturar
Valborg Jacobsen – Málningar
Sædis Eilifsdóttir – Glaslist
Tummas Jákup Thomsen – Tekningar og málningar
Framsýningin er eitt gott íkast til listaumhvørvið í grannabygdunum, og ber boð um skapanarevni og hugflog. Eisini um framleidni/produktivitet, tí har var hópin av verkum.
Stuttligt er at síggja skemtiligu og beinraknu tekningarnar hjá Jens Klæmint Jacobsen, men hann dugir eisini at gera skulpturar. Hann hevði modulerað Palla Gregoriussen – rættiliga beinrakið og væl gjørt.
Tummas Jákup Thomsen hevur altíð verið frælsur í sínum stíli og roynir nýggjar leiðir. Ungu spírarnir eru sanniliga eisini áhugaverdir.
Ein góður siður við slíkari páskaframsýning, har eisini fekst ein góður kaffimuður við køkum.
